Alþjóðaólympíunefndin, IOC, mun í dag á fundi í Lima í Perú taka ákvörðun um hvort strandhandbolti verði keppnisgrein á Ólympíuleikum frá og með leikunum 2024.
Verulegar líkur eru á að íþróttin fái brautargengi innan hinnar íhaldssömu hreyfingar sem IOC er. Komi til þess má hinsvegar reikna með að tilkoma strandhandboltans komi niður á keppni í hefðbundnum handknattleik sem reyndist vera önnur aðsóknarmesta íþróttagrein leikanna í Ríó í fyrra.
Vegna ramma um fjölda keppenda á hverjum Ólympíuleikum er talið fullvíst að hefðbundin handknattleikskeppni verði skorin niður, þátttökuliðum fækkað og keppni stytt frá því sem verið hefur frá því innanhússhandknattleikur varð almenn keppnisgrein sumarleika árið 1972.