KA og Grótta mættust í þriðju umferð Olísdeildar karla í KA-heimilinu á Akureyri nú í dag. Leiknum lauk með 25:25 jafntefli.
Fyrri hálfleikur var frekar kaflaskiptur og skiptust liðin á að hafa forystu. Gróttumenn komust í 6:3 áður en KA-menn tóku 4:0 kafla og komust í 7:6 um miðjan fyrri hálfleik. Eftir það varð meira jafnræði með liðunum, þó voru Gróttumenn alltaf skrefi á undan í fyrri hálfleik. Staðan 12:11 fyrir Gróttu þegar fyrri hálfleik lauk.
Seinni hálfleikurinn var jafn og spennandi líkt og sá fyrri. Liðin skiptust á að hafa forystu og varð munurinn á liðunum aldrei meiri en tvö mörk. Þegar leið á leikinn voru það KA-menn sem höfðu yfirhöndina á meðan Gróttumenn eltu.
Þegar 59 mínútur voru liðnar fengu KA-menn dauðafæri til þess að komast í 26:24 en Stefán Huldar varði frábærlega frá Daða Jónssyni. Gróttumenn áttu þá loka sókn til þess að jafna. Gunnar Dan fékk boltann inn á línuna og átti skot í stöng og í innkast. Dómarar leiksins vildu meina að Svavar í marki KA hafði komið við boltann og Gróttumenn héldu boltanum. Dómur sem KA-menn voru afar ósáttir við.
Birgir Steinn Jónsson nýtti tækifærið og jafnaði metinn í 25:25 þegar 7 sekúndur voru eftir og þar við sat. Lokatölur 25:25 í jöfnum og skemmtilegum leik. Eftir leikinn eru KA-menn með 3 stig en Gróttumenn með 2 stig.
Árni Bragi Eyjólfsson var atkvæðamestur KA-manna með níu mörk. Hjá Gróttu var Ólafur Brim Stefánsson markahæstur með fimm mörk. Stefán Huldar Stefánsson var öflugur í marki Gróttu en hann varði 13 skot. Nicholas Satchwell varði 8 skot í marki KA.