Fredericia, undir stjórn Guðmundar Þórðar Guðmundssonar, er komið í úrslit um danska meistaratitilinn í fyrsta sinn í 44 ár.
Liðið hafði betur gegn Ribe-Esbjerg, 34:25, í lokaleik undanúrslitanna í gærkvöldi.
Liðin voru búin að gera tvívegis jafntefli en í Danmörku kemst það lið í úrslit sem fyrr nær í þrjú stig í einvíginu.
Að þessu sinni var Fredericia mun sterkari aðilinn á sínum heimavelli og var yfir í hálfleik, 16:12. Einar Þorsteinn Ólafsson skoraði þá eitt mark fyrir Fredericia.
Guðmundur skrifaði færslu á Facebook eftir sigurinn og sagðist vera orðlaus.
„Liðið mitt Fredericia Håndboldklub er komið í úrslit um danska meistaratitilinn í fyrsta skipti í 44 ár. Ég er eiginlega bara orðlaus.“