Margrét Kara til Stjörnunnar

Margrét Kara Sturludóttir.
Margrét Kara Sturludóttir.

Körfuknattleiksdeild Stjörnunnar staðfesti í dag að Margrét Kara Sturludóttir gengi til liðs við Stjörnuna eftir tveggja ára frí frá körfuknattleik. 

Margrét, sem sneri aftur til Íslands frá Noregi fyrir stuttu, hefur verið í viðræðum við Stjörnuna um tíma.

Ég var á fullu í flutningum þegar ég kom heim þannig að þetta tafðist aðeins en ég er bara mjög fegin að þetta sé ákveðið,“ sagði Margrét við mbl.is í dag.

Setja sér hófleg markmið.

Stjarnan keppir í fyrsta sinn í Dominos-deild kvenna í ár eftir að liðið sigraði Njarðvík í oddaleik 14. apríl síðastliðinn. Baldur Ingi Jónasson, þjálfari Stjörnunnar, segir að liðið sé enn að leita að liðsstyrk á markaðnum.

„Við ætlum að einbeita okkur helst að því að vinna á æfingum og að gera það sem skilar árangri. Við þurfum örugglega tvo leikmenn í viðbót til að vera samkeppnishæf í efstu deildinni,“ sagði Baldur.

Margrét Kara er mjög spennt fyrir verkefninu og segir að félagið sé í uppbyggingarstarfi.

Klúbburinn gefur mér mjög góða tilfinningu, mér líst vel á fólkið í kringum mig. Ég á enn eftir að fara á æfingu þannig að ég hlakka mjög til að kynnast nýju liðsfélögum mínum og þjálfara. Við ætlum að gera okkar besta til að halda okkur uppi. Við ætlum ekki að stefna á síðasta sætið eða neitt, við erum í uppbyggingarstarfi, hlökkum mikið til og ætlum að hafa gaman,“ sagði Margrét.

Margrét Kara lék áður fyrr með Keflavík og KR í úrvalsdeildinni og spilaði um skeið með landsliðinu en hún snýr aftur til Íslands eftir tveggja ára frí frá körfuboltanum í Noregi.

Margrét er náttúrulega reynslubolti og kemur til með að styrkja hópinn gríðarlega og jafnvel þótt hún hafi ekki spilað í um tvö ár efast ég ekki um að hún muni ná sínum fyrri styrk mjög fljótt og við ætlum bara að gefa henni tíma til þess,“ sagði Baldur. 

„Ég spilaði ekki úti í Noregi, það var ekki lið þar sem ég bjó þannig að ég er dálítið ryðguð,“ bætti Margrét við með bros á vör.

mbl.is