11 leikir fóru fram í NBA-deildinni í körfuknattleik í gærkvöldi og í nótt. Í leik Dallas Mavericks og New Orleans Pelicans skoruðu fjórir leikmenn 30 stig eða meira.
Luka Doncic setti persónulegt stigamet þegar hann skoraði 46 stig fyrir Dallas. Doncic var með tvöfalda tvennu því hann gaf 12 stoðsendingar að auki. Samherji hans Kristaps Porzingis fór sömuleiðis á kostum og skoraði 36 stig.
Zion Williamson í liði New Orleans skoraði sömuleiðis 36 stig, sem er persónulegt met hjá honum. Samherji hans Brandon Ingram skoraði einnig 30 stig.
Leikmennirnir fjórir eiga það sameiginlegt að vera allir undir 25 ára aldri og var þetta í fyrsta sinn í sögu NBA-deildarinnar sem fjórir leikmenn undir 25 ára skora 30 stig eða meira.
Lauk leiknum með 143:130 sigri Dallas í ótrúlegum leik.
Öll úrslit gærkvöldsins og næturinnar:
New Orleans – Dallas 130:143
New York – Washington 109:91
Minnesota – Charlotte 114:120
San Antonio – Atlanta 125:114
Oklahoma – Denver 95:97
Milwaukee – Utah 115:129
Memphis – LA Lakers 105:115
Boston – Detroit 102:108
Chicago – LA Clippers 106:125
Portland – Cleveland 129:110
Sacramento – Orlando 112:123