Tveir körfuboltamenn sem léku á Íslandi á síðasta keppnistímabili eru í landsliðshópi Íra sem tilkynntur hefur verið vegna leikja í forkeppni Evrópumótsins í sumar.
Annar þeirra er Taiwo Badmus sem var í stóru hlutverki með Tindastóli og fór með liðinu í úrslitaeinvígið um Íslandsmeistaratitilinn en hann hefur samið við Skagfirðinga um að leika áfram með þeim næsta vetur.
Hinn er Jordan Blount sem hóf síðasta tímabil með Þór á Akureyri í úrvalsdeildinni en fór síðan til Sindra á Hornafirði í 1. deildinni. Hann hefur nú samið við írska úrvalsdeildarliðið Neptune fyrir næsta tímabil.