Hlutabréf í Icelandair halda áfram að hækka í dag eftir að hafa hækkað um 7,5% í viðskiptum í gær í Kauphöllinni. Í 40 milljóna viðskiptum í dag hafa bréf félagsins hækkað um 6,1% og er gengi þeirra nú 8,65 krónur á hlut.
Í gær var greint frá því að tilboð dótturfélags Icelandair, Loftleiða Cabo Verde, í 51% hlut í ríkisflugfélaginu Cabo Verde Airlines á Grænhöfðaeyjum, hefði verið samþykkt.
Loftleiðir Icelandic, sem er dótturfélag Icelandair Group, er eigandi að 70% hlut í Loftleiðum Cabo Verde en aðrir hluthafar eiga 30%.
Þá var í gær einnig tilkynnt að WOW air, helsti samkeppnisaðili Icelandair, hefði ekki náð samkomulagi við Indigo partners um fjárfestingu þess síðarnefnda í WOW air. Ákveðið hefur verið að halda þeirri vinnu áfram til 29. mars, en frestur sem áður hafði verið gefinn til að klára samkomulagið rann út nú um mánaðamótin.