Heildarmat fasteigna hækkar mest á Akranesi af sveitarfélögum á Íslandi, eða um 19,1 prósent á yfirstandandi ári. Hækkun fasteignamatsins er að meðaltali 6,1 prósent og 5 prósent á höfuðborgarsvæðinu. Þetta kom fram á kynningarfundi Þjóðskrár á fasteignamati ársins 2020 á Grand hóteli í morgun.
Starfsmenn Þjóðskrár fóru á fundinum yfir fasteignamatið, en það nær til 201.055 fasteigna; íbúðarhúsnæðis, skrifstofu- og verslunarhúsnæðis og sumarhúsa og endurspeglar markaðsverð í febrúar 2019. Þrjár aðferðir eru notaðar við matið; markaðs-, tekju- og kostnaðaraðferðir.
Ekki er um að ræða miklar hækkanir á höfuðborgarsvæðinu en þrátt fyrir það er það enn dýrasta svæðið á landinu. Matssvæðum á höfuðborgarsvæðinu hefur verið fjölgað nokkuð til að matið endurspegli nákvæmar þær verðbreytingar sem orðið hafa á svæðinu með þéttingu byggðar síðustu misseri.
Hækkun fasteignamats á Vesturlandi er 10,2 prósent og á Akranesi er hún 19,1 prósent. Af hverju svona mikil hækkun á Akranesi?
Í matinu hækkar íbúðarhúsnæði á höfuðborgarsvæðinu um 5 prósent en um 9,1 prósent á landsbyggðinni. Fasteignamat íbúða hækkar mest á Akranesi en þar hækkar íbúðarmatið um 21,6%, um 17,7% í sameinuðu sveitarfélagi Sandgerðis og Garðs (Suðurnesjabæ) og um 16,6% í Vestmannaeyjum.
Meðalhækkun sumarhúsa er 0,7 prósent. Nokkrar breytingar hafa verið gerðar á aðferðafræði við útreikning á fasteignamati sumarhúsa og má þar helst nefna fjölgun matssvæða yfir allt landið auk þess sem útreikningi lóðaverðs hefur verið breytt þannig að sumarhúsalóðir undir meðalstærð lækka en lóðir yfir meðalstærð hækka. Lóðaverð sumarhúsa lækkar því að jafnaði um 23 prósent á milli ára á meðan húsmatið sjálft hækkar um 7,5 prósent.
Fram kom á kynningunni að með fjölgun matssvæða sé hægt að aðgreina betur fasteignamat ólíkra svæða og lækka strjálbýl svæði sem hafa takmarkaðar samgöngu og eru langt frá annarri byggð. Þar voru nefnd svæði eins og hálendið, Norður-Múlasýsla og Mjóifjörður þar sem fasteignamat lækkar um meira en 30 prósent.