KEA hefur skilað lóðinni við Hafnarstræti 80 á Akureyri til bæjaryfirvalda og því verður ekki af byggingu hótels á lóðinni af hálfu félagsins. KEA hefur undanfarin ár áformað að reisa og leigja 150 herbergja hótel við Hafnarstræti 80 eða á svokallaðri Umferðarmiðstöðvarlóð.
Fréttamiðillinn Vikudagur greinir frá þessu.
Haft er eftir Halldóri Jóhannssyni, framkvæmdastjóra KEA, að ekki hafi skapast skilyrði fyrir því að áform félagsins á lóðinni gangi eftir eins og lagt var upp með.
Hann segir enn fremur í samtali við Vikudag að bæjaryfirvöld á Akureyri hafi í haust ekki viljað veita félaginu frekari frest til að bíða betri ytri skilyrða til þess að hefja framkvæmdir á lóðinni og því ekki annað að gera en að skila lóðinni.