Nauðsynlegt er að hvert einasta fyrirtæki og hver einasta stofnun hugsi sinn gang og grípi til aðgerða til að hindra að kynbundin mismunun og áreitni eigi sér stað. Þetta sagði Gunnþór B. Ingvason, framkvæmdastjóri Síldarvinnslunnar, á sérstökum fundi fyrir starfsmenn fyrirtækisins.

Útgerðin boðaði til fundarins á föstudag og var Magnús Orri Schram, stjórnarmaður UN Women á Íslandi, fenginn til að halda fyrirlestur. Fjallaði hann þar um eðli #metoo-byltingarinnar og beindi sjónum sérstaklega að Íslandi. Þá lagði hann áherslu á ábyrgð karlmanna í breyttum heimi og hvatti karlmenn til að endurskoða viðhorf sín og hegðun í garð kvenna.

Lásu upp frásagnir kvenna

Gunnþór tilkynnti að framvegis myndu hefðbundin dagatöl, prýdd fáklæddum eða berum konum, ekki fara upp á vegg á vinnustöðum og í skipum Síldarvinnslunnar. Nú við upphaf nýs árs, þegar sendingar bærust af slíkum dagatölum, færu þau „öll með tölu beint í ruslið“.

Enn fremur lásu upp á fundinum þær Ingibjörg Þórðardóttir, Birta Sæmundsdóttir og Sólveig Helga Björgúlfsdóttir frásagnir kvenna sem orðið hafa fyrir áreitni. Um sjötíu manns sóttu fundinn og höfðu margir orð á því að þarna væri um þarft og gott framtak að ræða, að því er fram kemur á vef Síldarvinnslunnar.

Tengdar fréttir

MeT­oo - #Ég líka

Weinstein mætti í dómssal á ný

• Réttað aftur yfir Weinstein í nóvember
• MeToo-aðgerðasinni í fimm ára fangelsi
• Minnisvarða um #MeToo hafnað
• Weinstein fluttur á sjúkrahús

» Fleiri tengdar fréttir

• 2 blogg um fréttina

Bloggað um fréttina

• Geir Ágústsson: Hvað með dagatöl slökkviliðsmanna?
• Páll Vilhjálmsson: Einkalíf, samfélagsmiðlar og áreitni