„Held að þetta verði ágætis vertíð“

„Í síðasta holinu fengum við 590 tonn og toguðum einungis í einn og hálfan tíma. Það er talsvert mikið að sjá af loðnu. Lóðningarnar eru þéttar og þær gefa vel. Sú breyting hefur orðið að nú fiskast jafnt að nóttu sem degi en fyrr á vertíðinni fékkst lítið yfir nóttina,“ segir Tómas Kárason, skipstjóri á Beiti NK, sem kom til Neskaupstaðar í gærkvöldi með 2.550 tonn af loðnu.

Allur er aflinn kældur og er verið að vinna hann í fiskiðjuveri Síldarvinnslunnar, að því er fram kemur í tilkynningu. Er þar haft eftir Tómasi að vertíðin líti vel út.

„Við vorum að veiða 68 mílur austnorðaustur af Norðfjarðarhorni og það verður að segjast að veiðiferðin gekk vel. Við fengum aflann í fimm holum og toguðum alltaf í fjóra tíma eða skemur,“ segir skipstjórinn.

Lestu meira

Skrýtið ef ekki verður bætt við

„Nú bíður maður spenntur eftir niðurstöðu mælinga en það hlýtur að verða bætt við kvótann. Það er samdóma álit manna á skipunum að það sé töluvert mikið af loðnu á ferðinni og hún sést víða. Skipin hafa verið að veiða á nokkrum blettum og það er langt á milli þeirra. Ég held og vona að þetta verði ágætis vertíð.“

• Blogga um frétt