Í Vestmannaeyjum eru hjól atvinnulífsins tekin að snúast á ný eftir hina árlegu Þjóðhátíð. Hjá Vinnslustöðinni horfa menn aftur til hafs á sama tíma og nafni sölufélags útgerðarinnar hefur verið breytt.
„Nú erum við að fara á fulla ferð aftur. Bátarnir eru að komast á miðin og við setjum aftur í efsta gír,“ segir Sigurgeir Brynjar Kristgeirsson, framkvæmdastjóri Vinnslustöðvarinnar í Vestmannaeyjum. „Við tókum nú gott hlé yfir Þjóðhátíð. Það þýðir ekki bara að afla, heldur verður líka að eyða, og þá skiptir ekki bara máli að vinna, heldur líka að skemmta sér,“ segir Brynjar léttur í bragði er blaðamaður slær á þráðinn til hans.
Tilefnið er sú ákvörðun útgerðarinnar, sem greint var frá á þriðjudag, að breyta nafni sölufélags fyrirtækisins úr About Fish og yfir í VSV Seafood Iceland. Verður nöfnum erlendra sölufélaga einnig samhliða breytt úr About Fish í VSV. Er breytingin sögð styrkja heitið VSV í markaðsstarfi félagsins, enda tengist það betur framleiðsluhluta þess.
„Fyrst og fremst var þetta gert til að skýra línurnar,“ segir Brynjar. „Mörgum þeim sem versla við okkur hefur fundist eins og einhver aðili væri kominn þarna á milli í viðskiptunum, en við erum auðvitað alltaf að selja vörur undir merkjum VSV og þá er bara eðlilegt að besta sölufyrirtækið heiti líka VSV,“ bætir hann við. „Þá verður enginn ruglingur.“
Skammstöfunin VSV hefur enda fylgt fyrirtækinu lengi, eins og Brynjar greinir frá:
„Allt frá upphafi hefur þetta verið kallað VSV hér í Vestmannaeyjum, en í fyrstu hét fyrirtækið Vinnslu- og sölumiðstöð Vestmannaeyja og var þá kaupfélag líka. Svo var það stytt niður í Vinnslustöð Vestmannaeyja og alla tíð hefur VSV haldið sér. Í raun má segja að þetta sé vestmannaeysk málvenja sem fylgt hefur fyrirtækinu, og við höfum sett vörur okkar undir það merki.“
En eins og áður sagði horfir hugur þeirra hjá VSV til hafs á ný eftir hátíðina árlegu. „Það þarf að keyra hjól atvinnulífsins af stað eftir gleði helgarinnar,“ segir Brynjar og bætir við að uppsjávarskipunum hafi verið stefnt út á makrílveiðar.
„Svo eru humarbátarnir á humri, þar sem veiðin hefur verið aðeins betri undanfarið en hún var fyrr í sumar. Botnfiskskipin eru svo auðvitað á botnfiskveiðum, þannig að þetta er allt komið aftur í hefðbundið mynstur.“