Fiskaflinn 27% meiri en í júlí 2017

Fiskafli íslenskra skipa í júlímánuði var 93.551 tonn sem er 27% meira en í júlí árið á undan. Botnfiskafli í mánuðinum var rúm 34 þúsund tonn og er það tæpum 5 þúsund tonnum meira en í júlí 2017. Þetta kemur fram í frétt á vef Hagstofunnar.

Af botnfisktegundum veiddist mest af þorski, eða tæp 20 þúsund tonn sem er 16% aukning. Rúm 5.000 tonn veiddust af ufsa, 4.611 tonn af karfa og 3.555 tonn af ýsu.

Uppsjávarafli nam tæpum 54 þúsund tonnum og er það 37% meiri afli en í júlí í fyrra. Voru kolmunni og makríll uppistaðan í uppsjávaraflanum og veiddust um 25 þúsund tonn af hvorri tegund. Skel- og krabbadýraafli nam síðan 1.912 tonnum samanborið við 1.626 tonn í júlí 2017.

Verðmæti aflans í júlí, metið á föstu verðlagi, var 15% meira en í júlí 2017.

Heildarafli á 12 mánaða tímabili frá ágúst 2017 til júlí 2018 var tæp 1.286 þúsund tonn og er það 11% samdráttur miðað við sama tímabil ári fyrr.

• Blogga um frétt