Vilja fullnýta burðarþol Reyðarfjarðar

Laxar fiskeldi hafa lagt fram nýja tillögu að matsáætlun vegna mats á umhverfisáhrifum 4 þúsund tonna aukningar á laxeldi í Reyðarfirði og í innfirðinum Eskifirði.

Með umhverfismatinu undirbýr fyrirtækið áform sín um að fullnýta burðarþol fjarðanna sem Hafrannsóknastofnun metur 20 þúsund tonn. Ekki er tekið tillit til væntanlegs áhættumats sömu stofnunar sem takmarkar eldi í Reyðarfirði við 9 þúsund tonn, samkvæmt fyrirliggjandi drögum.

Laxar fiskeldi eru með lax í kvíum í Reyðarfirði, hafa leyfi fyrir 6 þúsund tonna framleiðslu og er með 10 þúsund tonna viðbótarframleiðslu í leyfisveitingaferli. Nú eru metin umhverfisáhrif 4 þúsund tonna til viðbótar, þannig að heildareldið verði 20 þúsund tonn á ári sem sagt er í tillögu að matsáætlun að sé hagkvæm eining fyrir félag í nútíma laxeldi, að því er fram kemur í umfjöllun um áform þessi í Morgunblaðinu í dag.