Góð veiðiferð hjá Viðey RE

Ísfisktogarinn Viðey RE er kominn í höfn í Reykjavík eftir mjög góða sex daga veiðiferð. Skipið var með fullfermi eða 190 tonn af fiski upp úr sjó.

„Við hófum veiðar vestur af Jökli en þar var góð karfaveiði. Við sigldum þaðan í eina 18 tíma norður og austur á Strandagrunn. Þar var mjög góð þorskveiði en þorskurinn hefur verið frekar vandveiddur það sem af er vetri. Við færðum okkur svo vestur á Halann og fengum þar góða þorsk- og ufsaveiði,“ segir Kristján E.  Gíslason skipstjóri í tilkynningu frá Brim.

Á Halanum voru svo Kristján og skipverjar á Viðey um hríð þegar óveður gerði. „Við hröktumst á brott undan veðrinu og ég ákvað að sigla beint suður á okkar gömlu heimaslóðir á Fjöllunum. Það klikkaði ekki frekar en endranær. Við vorum þar í nokkra tíma í mjög góðri karfaveiði og einnig í ufsa og þessar stundir dugðu til að fylla körin og ná fullfermi,“ segir hann í tilkynningunni.

• Blogga um frétt