Sjávarútvegssýningunni Seafood Expo North America, sem fram átti að fara í Boston 15.-17. mars, hefur verið frestað vegna útbreiðslu kórónuveirunnar.

Á annan tug íslenskra fyrirtækja ætluðu sér að taka þátt í sýningunni, þeirra á meðal Marel, Eimskip, Brim og Arnarlax, svo nokkur séu nefnd, auk þess sem Íslandsstofa ætlaði sér að vera með landkynningarbása.

Skipuleggjendur sýningarinnar tilkynntu um þessa ákvörðun í gær og sögðu hana erfiða, en óumflýjanlega í ljósi aðstæðna. Stefnt er að því að halda sýninguna síðar á þessu ári á einhverjum öðrum stað í Norður-Ameríku, ef tækifæri gefst til, en það yrði þá kynnt síðar.

Fyrirtækjum verður gert kleift að nýta það gjald sem þau þegar höfðu greitt fyrir leigu á sýningarbásum til þess að taka þátt í sýningunni sem mögulega verður haldin síðar á þessu ári, eða sýningu næsta árs, sem áætlað er að fari fram í Boston í mars 2021.

Alls höfðu yfir 1.300 fyrirtæki frá 49 ríkjum boðað þátttöku í sýningunni, sem er ein sú stærsta í geiranum.

Tengdar fréttir

Kórónuveiran Covid-19

Heimsfaraldurinn var æfing í seiglu

• Engar aukaverkanir eftir 217 bólusetningar
• „Við þurfum að vera tilbúin“
• Ríkið hafði betur gegn skjólstæðingi Arnars
• Hæstiréttur staðfestir efndaskyldu tveggja hótela

» Fleiri tengdar fréttir

• Blogga um frétt