Margir sækjast nú eftir því að komast á sjó ef marka má upplifun skipstjórans á Blængi. Telur hann ástæðuna vera að það þrengi að efnahag nú þegar atvinnuleysi er meira en verið hefur.

Borið hefur á því að undanförnu að hringt sé um borð og spurt um pláss á skipinu, segir skipstjórinn Bjarni Ólafur Hjálmarsson á vef Síldarvinnslunnar. „Það virðist vera að þrengja að víða. Ég hef ekki upplifað svona margar hringingar áður. Það koma engin símtöl frá Austfirðingum, þau koma flest frá höfuðborgarsvæðinu og Akureyri og það eru bæði vanir og óvanir menn sem hafa samband.“

Afli fyrir 265 milljónir

Síðasta túr Blængs NK á fiskveiðiárinu lauk í gær er togarinn kom til hafnar í Neskaupstað. Skilaði veiðiferðin 726 tonnum úr sjó að verðmæti 265 milljónir króna og var um helmingur aflans ufsi auk þorsks, gullkarfa og grálúðu.

„Í túrnum þurftum við að veiða það sem eftir var að veiða á kvótaárinu,“ er haft eftir Bjarna Ólafi Hjálmarssyni, skipstjóra á Blængi. „Við vorum mest fyrir vestan frá Hala og vestur á Hampiðjutorg og síðan vorum við í grálúðu fyrir austan land. Það var gott veður allan tímann og þá er ekki hægt að kvarta. Auk þess má segja að túrinn hafi einkennst af ágætiskroppi þannig að menn eru sáttir,“ segir hann.

Landað verður úr Blængi á morgun og gert er ráð fyrir að hann haldi í fyrstu veiðiferð nýs kvótaárs síðdegis á mánudag.

Tengdar fréttir

Kórónukreppan

Áfangaheimilinu lokað ef ekki er gripið inn í

• „Þetta er allt saman á fleygiferð“
• Of harðar aðgerðir í faraldrinum
• Sjá fram á minna atvinnuleysi
• „Það er best að hafa samræmi í þessu“

» Fleiri tengdar fréttir

• Blogga um frétt