Umfangsmikill loðnuleiðangur á vegum Hafrannsóknastofnunar stendur nú yfir og taka átta skip þátt, þar af eru sex við mælingar á stærð hrygningastofns loðnu. Vonað er að mælingarnar skapi grundvöll fyrir nýrri veiðiráðgjöf en aðeins hefur verið gefin út heimild til veiða á 61 þúsund tonnum af loðnu.

Fram kemur í færslu á vef Hafrannsóknastofnunar að leiðangurinn sé framhald mælinga sem voru gerðar austan við land dagana 17.-20. janúar og er gert ráð fyrir að honum ljúki um eða eftir næstu helgi.

„Fjögur skip eru nú að störfum fyrir austan land og munu mæla til vesturs, þrjú byrja á Vestfjarðamiðum og halda til austurs og loks er eitt skipanna við leit og mælingar austan við hefðbundið mælisvæði til að kanna hvort loðna sé mögulega að ganga suður á þeirri slóð,“ segir í færslunni.

Við mælingar eru rannsóknaskipin Árni Friðriksson og Bjarni Sæmundsson ásamt uppsjávarskipunum Aðalsteini Jónssyni SU, Ásgrími Halldórssyni SF, Berki NK og Jónu Eðvalds SF, en Jóna Eðvalds mun kanna hvort loðna sé að ganga sunnar. Auk þessara sex eru tvö leitarskip og eru það Bjarni Ólafsson AK og Hákon EA.

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir

• Blogga um frétt