Sigldi fiskiskipi undir áhrifum fíkniefna

Landsréttur staðfesti á föstudag dóm héraðsdóms yfir karlmanni sem var dæmdur til að greiða í ríkissjóð 380 þúsund krónur fyrir að sigla skipi undir áhrifum fíkniefna, sem og að aka bíl undir áhrifum sömu fíkniefna.

Maðurinn var skráður skipstjóri skipsins og var því sakfelldur, en yfirstýrimaður skipsins, sem einnig var undir áhrifum um borð var ekki sakfelldur þar sem ábyrgðin var skipstjórans. Hann verður sviptur skipstjórnarréttindum í þrjá mánuði.

Maðurinn játaði að hafa ekið undir áhrifum en ekki siglt og bar fyrir sig að yfirstýrimaðurinn hafi gert svo, siglt skipinu um Skagafjörð áður en því var svo lagt við bryggju á Sauðárkróki. 

Mat Landsréttar var að ekki fengist annað ráðið en að maðurinn hefði verið við stjórn fiskiskipsins og að hann bæri ábyrgð á stjórn þess sem skipstjóri. 

• Blogga um frétt