Gat á nótarpoka einnar sjókvíar Arnarlax við Haganes í Arnarfirði uppgötvaðist við neðansjávareftirlit og barst Matvælastofnun tilkynning þess efnis á mánudag, að því er fram kemur í tilkynningu á vef stofnunarinnar.

Um 120 þúsund laxar að meðalstærð 0,8 kíló voru í umræddri kví og er ekki vitað hvort laxar hafi strokið úr kvínni að svo stöddu. Gatið var á tveggja metra dýpi og um það bil tveir sinnum tveir metrar að stærð. Síðasta neðansjávareftirlit var framkvæmt 31. júlí og var nótarpokinn þá heill.

„Eftirlitsmaður Matvælastofnunar hefur skoðað aðstæður og viðbrögð fyrirtækisins og er atvikið til meðferðar hjá stofnuninni,“ segir í tilkynningu stofnunarinnar. Þar segir jafnframt að Arnarlax hafi lagt út net í samráði við Fiskistofu til að kanna hvort strok hafi átt sér stað.

„Netanna var vitjað síðdegis á mánudag og þriðjudag. Á mánudag komu tveir fiskar í netin sem reyndust að öllum líkindum sjóbirtingar og á þriðjudag veiddist einn lax sem var rúm 2 kg. Fiskarnir verða sendir til Hafrannsóknastofnunar til greiningar.“

Tengdar fréttir

Fiskeldi

Akureyringar taka ekki afstöðu

• Lagareldisfrumvarpið ekki lagt fram
• Þróa aðferð til framleiðslu á geldlaxi
• Stórfellt laxeldi áformað
• Stýrir sölu- og markaðsmálum First Water

» Fleiri tengdar fréttir

• Blogga um frétt