Hoffell SU náði ekki öllum þeim afla sem skipinu var úthlutað á loðnuvertíðinni. Engu að síður tókst áhöfninni á Hoffellinu að ná afla fyrir milljarð króna á fyrsta ársfjórðungi og hefur aldrei náðst meiri aflaverðmæti í sögu skipsins á fyrstu þrem mánuðum ársins.

Flestir vilja meina að það sé tíðarfarinu að kenna að íslensku skipunum tókst ekki að ná öllum þeim afla sem þau voru með heimildir fyrir á vertíðinni og er það líkleg skýring þar sem stanslausar lægðir hafa einkennt veturinn, enda rúmlega 160 þúsund tonn útistandandi að vertíð lokinni.

„Það hefði alveg mátt ganga betur,“ er haft eftir Sigurði Bjarnasyni, skipstjóra á Hoffelli, í færslu á vef Loðnuvinnslunnar. Ef ekki er tekið tillit til veðurfarsins vill hann meina að vertíðin hafi gengið vel að öllu öðru leyti og að hrognatakan hafi verið með ágætum. Hoffell náði tæpum 20 þúsund tonnum af loðnu og var verðmæti hennar rúmlega milljarður króna, sem gerir þetta besta fyrsta ársfjórðung í sögu skipsins hvað verðmæti varðar.

Sigurður kveðst ekki dvelja of lengi við það sem liðið er og hefur hafið undirbúning næstu vertíðar enda styttist óðum í kolmunnavertíð. Nú stendur til að þrífa og þvo, gera og græja og mun áhöfnin á Hoffelli sinna því næstu vikur, að því er segir í færslunni. „Hér eru allir við hestaheilsu og tilbúnir í næsta slag,“ segir skipstjórinn.

Tengdar fréttir

Loðnuveiðar

Kaupa norska loðnu á uppboði

• Árangurslausri loðnuleit formlega lokið
• Ekkert markvert fundist af loðnu
• Heimaey bættist í hóp leitarskipa
• Tvö skip leita nú loðnu suðaustur af landinu

» Fleiri tengdar fréttir