Sérstakri minningabók hefur verið komið fyrir í ráðhúsi Stokkhólms fyrir þá sem vilja minnast fórnarlamba árásarinnar í miðborginni í dag. Verður hægt að rita nafn sitt í bókina frá og með morgundeginum, að því er fram kemur á vefsíðunni stockholmterror.se sem sænsk yfirvöld hafa opnað.
Fjórir létust í árásinni og 12 hið minnsta slösuðust, þar af 9 alvarlega. Hafa yfirvöld ekki geta útilokað að tala látinna muni hækka.
Sænska lögreglan handtók í kvöld mann á fertugsaldri sem grunaður er um að standa að hryðjuverkaárásinni. Maðurinn er sagður vera 39 ára gamall Úsbeki, að því er segir á vef sænska Aftonbladet og á áður að hafa lýst yfir stuðningi við hryðjuverkasamtökin Ríki íslams.