Kjörstaðir í Katalóníu voru opnaðir í morgun þar sem þingkosningar fara fram í héraðinu. Kosningarnar verða líklega tvísýnar ef marka má skoðanakannanir því litlu munar á fylgi stuðningsmanna og andstæðinga sjálfstæðis í Katalóníu.
Katalónska þingið samþykkti í lok október að lýsa yfir sjálfstæði frá Spáni, en kosið var um sjálfsstjórn héraðsins í þjóðaratkvæðagreiðslu byrjun október. Ríkisstjórn Spánar svipti Katalóníu sjálfsstjórn í kjölfar yfirlýsingarinnar og boðaði til kosninga í héraðinu.
Talsverð spenna er í héraðinu vegna harkalegrar framgöngu lögreglunnar í síðustu kosningum. Þá voru mótmælendur handteknir og kjörstöðum lokað. Þrátt fyrir kosningarnar telja álitsgjafar BBC að þær muni ekki leysa pólitískan vanda héraðsins.
ERC, flokkur sjálfstæðissinna, og Borgaraflokkurinn, flokkur sameiningarsinna, berjast um forsæti á þinginu.