Hinrik prins, eiginmaður Margrétar Þórhildar Danadrottningar, er með góðkynja æxli í lunga. Þetta kemur fram í tilkynningu frá dönsku konungsfjölskyldunni.
Hinrik, sem er 83 ára og var greindur með heilabilun í fyrra, var lagður inn á sjúkrahús um síðustu helgi við komu sína til Kaupmannahafnar frá Egyptalandi þar sem hann hefur dvalið frá því í janúar. Hann var sendur í frekari rannsóknir á Ríkissjúkrahúsið í Kaupmannahöfn þar sem góðkynja æxlið kom í ljós.
Frétt mbl.is: Hinrik prins á sjúkrahúsi
Í frétt The Local segir að Hinrik hafi verið fluttur á smitsjúkdómadeild sjúkrahússins þar sem hann fær meðferð við sýkingu í lungum. Eftir að meðferðinni lýkur verður prinsinn fluttur í kastalann í Fredensborg. Margrét Þórildur, drottningin, hefur nú þegar flutt aðsetur sitt í kastalann.
Hinrik, sem er franskur, gekk að eiga Margréti Þórhildi árið 1967. Þegar Margrét varð drottning árið 1972 fékk hann ekki konungstign og hefur Hinrik aldrei farið leynt með óánægju sínu hvað það varðar. Hann hefur meðal annars tilkynnt að hann vilji ekki vera jarðsettur við hlið drottningarinnar þegar að því kemur þar sem hann hafi aldrei verið álitinn jafningi hennar.