Dómstóll í norðurhluta Þýskalandi úrskurðaði í dag að Carles Puigdemont, fyrrverandi forseti Katalóníuhéraðs, muni sitja áfram í varðhaldi í Þýskalandi.
Þýska lögreglan handtók Puigdemont í gær á grundvelli evrópskrar handtökutilskipunar. Spænsk stjórnvöld hafa farið fram á að Puidgemont verði framseldur til Spánar. Hann verður áfram í varðhaldi í Þýskalandi þar til stjórnvöld hafa tekið afstöðu til framsalsbeiðninnar. Ákvörðunin þarf að liggja fyrir innan tveggja mánaða.
Puigdemont hefur verið í sjálfskipaðri útlegð í Belgíu frá því katalónska þingið lýsti einhliða yfir sjálfstæði frá Spáni í október.
Fjölmenn mótmæli brutust út í Katalóníu í gær þegar fregnir bárust af því að forsetinn fyrrverandi hefði verið handtekinn. Talið er að rúmlega fimmtíu þúsund manns hafi tekið þátt í mótmælunum. Að minnsta kosti 50 slösuðust í átökum við vopnaða lögreglumenn.