Evrópusambandið virðist ætla í hart við Donald Trump, forseta Bandaríkjanna, en æðsti yfirmaður utanríkis- og öryggismála sambandsins hefur hvatt fyrirtæki í Evrópu til að auka frekar viðskipti við Íran, heldur en hætta þeim, líkt og Trump vill að gert verði. The Guardian greinir frá.
Viðskiptabann Bandaríkjanna gagnvart Íran tók gildi í nótt og hefur Trump hótað þeim þjóðum sem ætla sér að vera áfram í viðskiptum við Íran. „Hver sá sem verður í viðskiptum við Íran verður EKKI í viðskiptum við Bandaríkin,“ skrifaði forsetinn á Twitter í morgun. Þykir hvatning frá æðstu yfirmönnum ESB til fyrirtækja innan sambandsins því vera nokkuð ögrandi í garð forsetans.
Evrópusambandið vill halda í fjölþjóðlegt samkomulag við Íran um afnám kjarnorkuvopna, sem gert var í árið 2015, en Bandaríkin drógu sig út úr samkomulaginu fyrr á þessu ári. Sagði Trump það vera hræðilegt og of einhliða. Eftir að Trump sendi frá sér yfirlýsinguna á Twitter í morgun hafa fyrirtæki í Evrópu verið hvött til að virða að vettugi orð hans.
Federica Mogherini, æðsti yfirmaður utanríkis- og öryggismála hjá ESB, segir þau ríki sem standa að samkomulaginu ætli að láta það halda og hvatti hún jafnframt fyrirtæki til að taka sína eigin ákvarðanir þegar kæmi að fjárfestingum.