Segja Ísrael ábyrgt fyrir að þotan hrapaði

Rússnesk herþota af gerðinni Ilyushin-20, eins og sú sem hrapaði ...
Rússnesk herþota af gerðinni Ilyushin-20, eins og sú sem hrapaði eftir að hafa orðið fyrir skoti úr sýr­lenskri loft­varn­ar­byssu. AFP

Rússnesk stjórnvöld segja Ísraelsríki bera ábyrgð á því að skot úr sýr­lenskri loft­varn­ar­byssu lenti á rússneskri herþotu og að þau áskilji sér allan rétt til að bregðast við.

Rússneska Interfax-fréttastofan hefur eftir Igor Konashenkov, talsmanni rússneska varnarmálaráðuneytisins, að þotan, sem var af gerðinni Ilyushin-20, hafi hrapað eftir að S-200 loftvarnarkerfi Sýrlandsstjórnar reyndi að verjast árásum fjögurra F-16 herþota Ísraelshers á mannvirki sýrlensku stjórnarinnar í Damaskus.

Áður hafði verið greint frá því að herþotan, sem var með 15 manns inn­an­borðs, hefði horfið af radar á flugi yfir Miðjarðar­hafi, skammt frá Sýr­lands­strönd, seint í gær­kvöldi.

Konashenkov sagði Ísraelsher hafa tilkynnt rússneskum stjórnvöldum um fyrirhugaða árás innan við mínútu áður en hún var gerð og því hafi verið ómögulegt fyrir flugmanninn að koma þotunni af svæðinu áður.

„Afleiðingar þessa óábyrgu aðgerða Ísraelshers leiddu til dauða 15 rússneskra hermanna,“ sagði Konashenkov. Washington Post, sem fjallar um málið, segir ísraelsk stjórnvöld hafa neitað að tjá sig um ásakanirnar.

Washington Post segir að þó að rússnesk og ísraelsk stjórnvöld styðji andstæðar fylkingar í Sýrlandsstríðinu  hafi þau gætt þess að samræma aðgerðir sínar, ekki hvað síst í nágrenni landamæra Ísraels í suðausturhluta Sýrlands.

Þá hafi Vladimír Pútín Rússlandsforseti og Benjamin Netanyahu, forseti Ísraels, fundað reglulega um málefni Sýrlands, en Ísraelsher hefur að sögn blaðsins staðið fyrir um 200 árásum sl. 18 mánuði.

mbl.is
Vöruúrval fyrir fagurkera
Vöruúrval fyrir fagurkera Húsgögn - Gjafavörur, B&G postulín matar- og kaffistel...
Rafstöðvar DEK 30 KW 400/230 50 HZ Deutz 50 kw
Rafstöðvar varafl , 30 kw og 50 kw ,útvegum allar stærðir.Verð frá 990þ +vsk Vi...
Gefins - áttu klink sem þú mátt missa?
Kattholt þiggur með þökkum smámynt (hvaðan sem er). Þetta fer til að fjármagna...
Byggingarstjóri
Löggildur byggingarstjóri Sími 659 5648 stebbi_75@hotmail.com ...