Erlent | AFP | 27.11.2019 | 11:45

Trump náðaði „Brauð“ og „Smjör“

Donald Trump Bandaríkjaforseta tókst að blanda rannsókn fulltrúadeildar Bandaríkjaþings á meintum embættisbrotum hans inn í árlega athöfn í Hvíta húsinu þar sem kalkúnn er náðaður í aðdraganda þakkargjörðarhátíðarinnar.

Kalkúnarnir Brauð og Smjör (e. Bread and Butter) hlutu báðir náð og verða fluttir til Virginíu þar sem þeir munu dvelja í góðu yfirlæti.

Trump sagðist vita með vissu að kalkúnarnir væru þjálfaðir í að halda ró sinni, sem væri afar góður kostur þar sem þeir hafi verið boðaðir í vitnaleiðslu í „kjallaranum hjá Adam Schiff á fimmtudaginn“. „Þetta er satt,“ sagði Trump og uppskar hlátur viðstaddra. Schiff er þingmaður demókrata og formaður njósnanefndar fulltrúadeildar þingsins sem fer fyrir rannsókn á meintum embættisbrotum Trump.

Frétt af mbl.is

Trump vill að „nornaveiðum“ linni nú þegar

Dómsmálanefnd Bandaríkjanna hefur boðið Trump að vera viðstaddur yfirheyrslur vitna sem kölluð verða fyrir nefndina 4. desember og mun honum gefast kostur á að leggja spurningar fyrir vitnin, sem eru sérfræðingar í lögum, sér í lagi stjórnarskrárlögum og stjórnsýslulögum.

Donald Trump náðaði kalkúninn Brauð í aðdraganda þakkargjörðarhátíðarinnar við hátíðlega athöfn í garði Hvíta hússins. AFP

Segir Trump að mæta eða hætta að kvarta

Vitnaleiðslunum í næstu viku er ætlað að úrskurða hvort gjörðir Trumps geti flokkast sem alvarleg brot í embætti. Til rannsóknar eru embættisverk forsetans vegna þrýstings sem hann er talinn hafa beitt úkraínsk stjórnvöld til að taka Joe Biden, fyrrverandi varaforseta og forsetaframbjóðanda, til rannsóknar.

Jerry Nadler, formaður dómsmálanefndarinnar, segir að Trump geti annað hvort mætt eða „hætt að kvarta undan ferlinu“. „Ég vona að hann ákveði að taka þátt í rannsókninni, annað hvort í eigin persónu eða í gegnum lögmenn sína, líkt og aðrir forsetar hafa gert á undan honum,“ segir Nadler.

Ólíklegt verður að teljast að Trump mæti í eigin persónu. Hann hefur boðað þátttöku sína á leiðtogafundi Atlantshafsbandalagsins sem fer fram í London sama dag.