Fjögurra ára gamalli stúlku var bjargað út úr húsarústum í borginni Ízmir í morgun, 91 klukkustund eftir að harður jarðskjálfti reið yfir Eyjahaf. Yfir 100 hafa fundist látnir eftir skjálftann, langflestir í Tyrklandi en tveir unglingar létust á grísku eyjunni Samos. Jarðskjálftinn var 7 stig og olli gríðarlegum skemmdum, ekki síst í Ízmir-héraði.
„Við höfum orðið vitni að kraftaverki á 91. stundu,“ segir borgarstjórinn í Ízmir, Tunc Soyer, á Twitter. „Björgunarsveitir hafa bjargað Ayda, fjögurra ára gamalli stúlku, á lífi úr rústunum. Á sama tíma og við höfum upplifað gríðarlegan sársauka þá fögnum við.“
Tæplega þúsund slösuðust í jarðskjálftanum og af þeim eru 147 enn á sjúkrahúsi. Björgunarsveitir eru á vöktum allan sólarhringinn við leit í fimm byggingum sem hrundu í Ízmir-héraði. Ekki er vitað hversu margra er saknað.
Strandbærinn Bayrakli í Ízmir er sá sem varð verst úti í jarðskjálftanum en þar fundust tvær stúlkur á lífi í rústunum í gær. Báðar misstu systkini í hamförunum.