Sindri Snær Magnússon, fyrirliði ÍBV, sagði Eyjamenn nánast hafa byrjað 1:0 í tapleiknum gegn Fylki í Egilshöllinni í kvöld.
Fylkir skoraði strax á 4. mínútu og þannig var staðan þar til á 89. mínútu þegar Fylkir komst í 2:0. ÍBV minnkaði muninn í uppbótartíma og úrslitin urðu 2:1.
„Við byrjuðum leikinn nánast 1:0 undir og þurftum að vinna út frá því. Það var bókstaflega þannig enda vorum við með hausinn uppi í rassgatinu fyrstu mínúturnar og gáfum þeim mark á silfurfati. Við reyndum að vinna okkur út úr því en vorum bara slakir fyrsta hálftímann. En mér fannst okkur takast að vinna okkur inn í leikinn eftir það og verða ofan á í baráttunni. Við náðum ekki að nýta færin og það kom heldur betur í bakið á okkur,“ sagði Sindri þegar mbl.is ræddi við hann í Egilshöllinni.
ÍBV er enn að púsla sínu liði saman og hafa leikmenn bæst við eftir að deildin byrjaði. Liðið er með 1 stig eftir fjóra leiki. „Okkur hefur gengið þokkalega að púsla þessu saman þótt úrslitin hafi ekki sýnt það. Góðir kaflar í fyrstu fjóru leikjunum eru of fáir en þeir kaflar sem hafa verið góðir hafa verið mjög góðir. En okkur tekst ekki að nýta þá til að skora.“