Þetta var algjört rugl

„Við erum súrir með þessi úrslit og sérstaklega vegna allrar þeirra vinnu sem við lögðum í þennan leik,“ sagði Björn Berg Bryde, fyrirliði Grindvíkinga, við mbl.is eftir 2:1 tap gegn FH-ingum í fyrsta leik 12. umferðar í Pepsi-deild karla í knattspyrnu en liðin áttust við í Kaplakrika í dag.

„Mér fannst við góðir og þá sérstaklega eftir að það var orðið jafnt í liðunum aftur og við hefðum alveg getað sett þá annað mark. Við fórum í þennan leik til að vinna hann en ekki til að ná jafntefli. Mér fannst miðað við þá vinnu sem við lögðum í leikinn þá áttum við skilið að fá minnst eitt stig. Við höfum sagt það frá byrjun að markmið okkar er að gera betur heldur en í fyrra og við mætum bara tvíefldir í næsta leik,“ sagði Björn Bryde.

Spurður út í rauða spjaldið sem Brynjar Ásgeir Guðmundsson fékk að líta á þegar hann braut á Atla Guðnasyni innan vítateigs eftir rúmlega hálftíma leik sagði Björn Bryde;

„Mér fannst það algjört rugl. Nú erum við allir búnir að vera að horfa á HM og manni er svolítið minnisstætt atvikið með Rojo og Mbappé þegar Rojo hoppaði upp á bakið á Mbappé sem aftasti maður. Þá var dæmt víti og Rojo fékk gult spjald. Ég spurði dómarann út í þetta og hann mundi eftir þessu atviki. Hann sagði að dómarinn hefði haft rangt fyrir sér og reglurnar væru að gefa rautt spjald,“ sagði miðvörðurinn sterki við mbl.is.

• Blogga um frétt