Vissi að það myndi taka smá tíma að komast í gang

Danski framherjinn Jannik Pohl skoraði sigurmark Fram gegn Leikni úr Reykjavík í Mjólkurbikarnum í knattspyrnu í Safamýrinni í dag. Daninn hefur komið við sögu í öllum sjö deildarleikjum Fram á tímabilinu en átti eftir að brjóta ísinn við markið.

Frétt af mbl.is

Tíu Framarar áfram eftir framlengingu

„Það var svo góð tilfinning að skora fyrsta markið og borga félaginu aðeins til baka fyrir að hafa trú á mér. Mér fannst ég líka spila vel gegn Breiðabliki í síðasta leik, lagði upp mark þar,“ sagði Pohl í samtali við mbl.is strax að leik loknum en sigurmark hans kom í framlengingu eftir að Fram hafði misst niður tveggja marka forystu og fengið rautt spjald í venjulegum leiktíma.

Daninn er ánægður með að vera búinn að tryggja sæti í 16-liða úrslitunum. „Það er alltaf skemmtilegt að vera í bikarnum. Við erum nýliðar í Bestu deildinni og ekki að fara vinna hana. En bikarkeppnin er þess eðlis að öll lið eiga möguleika á að vinna hana, svo lengi sem þú ert með.“

Þá segir Pohl að hann eigi nóg inni í sumar eftir að hafa skorað loks fyrsta markið. „Ég kom hingað í Fram eftir langt og erfitt meiðslatímabil. Ég vissi að það myndi taka mig smá tíma að komast í gang en mér finnst ég alltaf verða betri og betri.“

• Blogga um frétt