Markamet félags í efstu deild karla féll í gærkvöld. Víkingar eiga fimmtu bestu byrjun í efstu deild karla frá upphafi og þrir reyndir leikmenn náðu stórum áföngum í leikjum síðustu daga í Bestu deildinni í fótbolta.
Nikolaj Hansen sló í gærkvöld markamet Heimis Karlssonar fyrir Víking í efstu deild þegar hann skoraði fyrra markið í ósigri Víkinga gegn Val, 2:3, í Fossvoginum. Þetta var 38. mark Danans fyrir félagið en Heimir skoraði 37 mörk fyrir Víking í deildinni á árunum 1978 til 1984.
Sigurganga Víkings var rofin með ósigrinum gegn Val í gærkvöld. Þeir eiga þar með staðfesta fimmtu bestu byrjun á tímabilinu í efstu deild karla, níu sigurleiki í röð. Valsmenn eiga metið, unnu fyrstu 16 leikina árið 1978. FH-ingar unnu fyrstu 15 leiki sína árið 2005, Skagamenn unnu fyrstu 12 leiki sína árið 1995 og KR-ingar unnu alla 10 leiki sína árið 1959.
Damir Muminovic, miðvörður Breiðabliks, lék sinn 300. deildaleik á ferlinum þegar Blikar unnu Val 1:0 á Kópavogsvelli síðasta fimmtudagskvöld. Af þessum leikjum eru 193 fyrir Breiðablik (eftir leik Breiðabliks og Keflavíkur í gærkvöld) þar sem hann er næstleikjahæstur í efstu deild frá upphafi, 22 fyrir Víking í Ólafsvík, 17 fyrir Leikni í Reykjavík, 35 fyrir HK, 25 fyrir Ými og 9 fyrir Hvöt en Damir hefur spilað í fjórum efstu deildum Íslandsmótsins. Langflestir leikir hans eru í efstu deild eða alls 231 talsins.
Sigurður Egill Lárusson varð í gærkvöld fimmti leikmaðurinn í sögu Vals til að spila 200 leiki fyrir félagið í efstu deild. Hann á samtals 218 leiki að baki í deildinni, fyrstu 18 með Víkingi, mótherjunum í gærkvöld. Á undan Sigurði í 200 leiki fyrir Val voru Bjarni Ólafur Eiríksson (244), Haukur Páll Sigurðsson (240), Sigurbjörn Hreiðarsson (240) og Sævar Jónsson (201).
Pablo Punyed, miðjumaður Víkings, lék í gærkvöld sinn 200. leik í efstu deild, gegn Val. Pablo á að baki 11 leiki í deildinni fyrir Fylki, 39 fyrir Stjörnuna, 42 fyrir ÍBV, 58 fyrir KR og nú 50 fyrir Víking. Pablo er fimmti erlendi leikmaðurinn sem spilar 200 leiki í deildinnni, á eftir Steven Lennon, Ian Jeffs, Paul McShane og Kennie Chopart.
Tryggvi Hrafn Haraldsson er orðinn næstmarkahæstur í deildinni með sex mörk fyrir Valsmenn. Hann hefur aðeins skorað í þremur leikjum, tvö í hverjum þeirra, en hin fjögur mörkin skoraði hann eftir að hafa komið inn á sem varamaður hjá Val. Seinna mark Tryggva í gærkvöld var hans 40. mark í deildinni.
Arnþór Ari Atlason varð þriðji HK-ingurinn frá upphafi til að skora 10 mörk í efstu deild fyrir félagið þegar hann skoraði eitt markanna í ósigrinum gegn FH í Kaplakrika, 4:3, í fyrrakvöld. Birnir Snær Ingason (12) og Atli Arnarson (10) eru hinir tveir.
Karl Ágúst Karlsson, sem er nýorðinn 16 ára, kom inn á hjá HK gegn FH og lék sinn fyrsta leik í efstu deild.
Úrslitin í 9. umferð og tveimur leikjum sem var flýtt:
KA - Víkingur R. 0:4
Breiðablik - Valur 1:0
Fylkir - ÍBV 2:1
FH - HK 4:3
KR - Stjarnan 1:0
KA - Fram 4:2
Víkingur R. - Valur 2:3
Keflavík - Breiðablik 0:0
Markahæstir í deildinni:
7 Stefán Ingi Sigurðarson, Breiðabliki
6 Tryggvi Hrafn Haraldsson, Val
5 Adam Ægir Pálsson, Val
5 Gísli Eyjólfsson, Breiðabliki
5 Guðmundur Magnússon, Fram
5 Nikolaj Hansen, Víkingi
5 Örvar Eggertsson, HK
4 Andri Rúnar Bjarnason, Val
4 Aron Jóhannsson, Val
4 Birnir Snær Ingason, Víkingi
4 Kjartan Henry Finnbogason, FH
4 Ísak Andri Sigurgeirsson, Stjörnunni
4 Úlfur Ágúst Björnsson, FH
3 Arnþór Ari Atlason, HK
3 Ásgeir Sigurgeirsson, KA
3 Benedikt Daríus Garðarsson, Fylki
3 Fred Saraiva, Fram
3 Guðmundur Baldvin Nökkvason, Stjörnunni
3 Gyrðir Hrafn Guðbrandsson, FH
3 Höskuldur Gunnlaugsson, Breiðabliki
3 Ólafur Karl Finsen, Fylki
3 Óskar Borgþórsson, Fylki
Næstu leikir:
1.6. ÍBV - HK
1.6. Fylkir - KR
2.6. Stjarnan - KA
2.6. Fram - Keflavík
2.6. Breiðablik - Víkingur R.
2.6. Valur - FH