Fjölmenni safnaðist saman við öldurhúsið O'Sullivans við Rauðu mylluna í París í dag og þar skapaðist mikil stemning. Aðeins eru örfáir tímar í stórleik Íslands við Frakkland á Stade de France.
Fyrir þá sem eru ekki með á nótunum hefst leikurinn klukkan níu að staðartíma í Frakklandi en klukkan sjö heima á Fróni.
Meðfylgjandi myndir tala sínu máli, en það fer ekkert á milli mála að Íslendingar á öllum aldri voru komnir saman til að skemmta sér og njóta þess frábæra árangurs sem íslenska karlalandsliðið hefur náð á EM.
Fimm lið eru eftir í keppninni þessa stundina; Wales, Portúgal, Þýskaland, Frakkland og Ísland. Það er augljóst að íslensku stuðningsmennirnir hafa fulla trú á liðinu en munu fagna því, sama hvernig leikurinn í kvöld fer.