Mikil spenna er á Wyndham-meistaramótinu í golfi sem fer fram í Norður-Karólínu en mótið, sem er hluti af PGA-mótaröðinni, er hálfnað.
Fjórir kylfingar deila toppsætinu eftir fyrstu tvo hringina. Bandaríkjamennirnir Tom Hoge, Talor Gooch og Billy Horschel og Suður-Kóreumaðurinn Si Woo Kim eru allir búnir að leika á samtals tíu höggum undir pari. Þá eru aðrir fimm kylfingar aðeins einu höggi frá þeim.
Nokkrir af þekktari kylfingum heims eru hins vegar úr leik, komust ekki í gegnum niðurskurðinn. Brooks Koepka, sem fjórum sinnum hefur sigrað á risamótunum í golfi, er úr leik ásamt Jim Furyk og Justin Thomas.
Þriðji hringurinn af fjórum hefst í dag og lýkur mótinu annað kvöld. Stöðuna má sjá með því að smella hér.