Handknattleiksmaðurinn Gunnar Steinn Jónsson hefur samið við danska úrvalsdeildarliðið Ribe-Esbjerg til næstu tveggja ára. Gunnar Steinn hefur undanfarin tvö ár leikið með sænska meistaraliðinu Kristianstad.
Þetta kemur fram á heimasíðu Ribe-Esbjerg.
Gunnar Steinn verður ekki eini Íslendingurinn í liðinu á næstu leiktíð því fyrir nokkru samdi landsliðsmaðurinn Rúnar Kárason við danska úrvalsdeildarliðið einnig til tveggja ára.
Gunnar Steinn er 31 árs og á að baki 42 landsleiki. Auk þess að leika með Kristianstad hefur Gunnar verið í herbúðum sænska liðsins Drott, Nantes í Frakklandi og hjá þýska liðinu Gummersbach. Hér á landi lék Gunnar Steinn með Fjölni og HK.
Ribe-Esbjerg hafnaði í 10. sæti af 14 liðum dönsku úrvalsdeildarinnar í vor.