Grundfirðingurinn Hlynur Bæringsson jafnaði í dag met sem Keflvíkingurinn Guðjón Skúlason setti fyrir sautján árum.
Hlynur er fyrirliði Stjörnunnar sem varð bikarmeistari í körfuknattleik rétt í þessu eftir sigur á Grindavík í úrslitaleik í Laugardalshöll.
Hlynur hefur þar með fjórum sinnum verið fyrirliði bikarmeistaraliðs hérlendis. Með Snæfelli 2008 og 2010 en þriðja skiptið kom í fyrra með Stjörnunni.
Guðjón varð fjórum sinnum bikarmeistari með Keflavík sem fyrirliði. 1993, 1994 og 1997 en fjórða skiptið kom árið 2003.