Bandaríska fimleikastjarnan Simone Biles mun taka þátt í úrslitum kvenna á jafnvægisslá á Ólympíuleikunum í Tókýó á morgun.
Þetta staðfesti fimleikasamband Bandaríkjanna nú í morgun.
„Við erum afskaplega spennt yfir því að geta staðfest að þið munuð sjá tvær bandarískar fimleikakonur í úrslitum tvíslár á morgun, Suni Lee OG Simone Biles!! Við getum ekki beðið eftir því að horfa á ykkur báðar!“ skrifaði sambandið á twitteraðgangi sínum.
Biles hafði dregið sig úr keppni í úrslitum allra einstaklingsgreina þar sem hún var búin að tryggja sér sæti í kjölfar þess að hafa dregið sig úr úrslitum liðakeppninnar í fimleikum.
Hún hafði dregið sig úr keppni til að einbeita sér að geðheilsu sinni, og sagðist vera þjökuð af „twisties“ þegar hún væri í loftinu.
Í fimleikum getur ástandið valdið því að íþróttafólk missi skyn á rými og plássi á meðan það er í loftinu, sem síðan veldur því að það missir stjórn á líkama sínum og gerir oft fleiri skrúfur eða heljarstökk en það hafði ætlað. Í slæmum tilvikum getur ástandið valdið því að íþróttamanneskjan nær ekki að lenda örugglega úr stökki.