Hafa landað meira en þúsund tonnum

Makrílafli smábátaveiðimanna er nú kominn yfir þúsund tonn og hefur mestu verið landað í Keflavík, eða alls 765 tonnum miðað við löndunartölur í gær.

Veiðisvæðin eru þau sömu og verið hafa undanfarin ár, að því er fram kemur á vef Landssambands smábátaeigenda, eða við Reykjanes, Snæfellsnes og í Steingrímsfirði.

Er Herja ST aflahæst, með 105 tonn, og hefur afli hennar fengist í Steingrímsfirði og verið landað á Hólmavík.

Alls hafa sjómenn á 37 smábátum hafið makrílveiðar, en að þeirra sögn er makríllinn brellinn. Stundum sé mikil veiði þar sem bátarnir séu fylltir á örskömmum tíma, en þess á milli verði menn ekki varir klukkutímum saman.

• Blogga um frétt