Heilsaði með sporðinum í Arnarfirði

Gervihnattasendum var skotið í tvo hnúfubaka í Arnarfirði í lok september. Það er nákvæmnisverk að koma merkinu í dýrin og nauðsynlegt að logn sé og sléttur sjór. Slíkar aðstæður voru í Arnarfirðinum og hvalirnir hafa síðan sent upplýsingar um ferðir sínar í gegnum gervitungl, eins og fram kom í blaðinu í gær.

Annað dýrið flutti sig fljótlega yfir í Húnaflóa, en hitt hefur að mestu haldið sig innarlega í Arnarfirði. Er starfsmenn Hafrannsóknastofnunar voru við rækjurannsóknir á Árna Friðrikssyni fyrir vestan í vikunni ráku þeir augun í merkta hnúfubakinn. Engu var líkara en hann sendi þeim kveðju með því að veifa sporðinum, en hægt er að þekkja hnúfubaka í sundur á einstaklingsbundnum rákum og litbrigðum á sporði.

Kveðja. Merktur hnúfubakur gæðir sér á smásíld og öðru góðgæti í Arnarfirði, en hægt er að þekkja hnúfubaka í sundur á sporðinum. Ljósmynd/Stefán Áki Ragnarsson

Ef vel gengur og merkin tolla í hnúfubökunum senda þeir upplýsingar um ferðir sínar í vetur. Hvort sem þá verður að finna í æti á loðnuslóð fyrir norðan land, sem gæti nýst uppsjávarflotanum, eða þeir halda á vit ævintýra í Karíbahafinu. Þar eru þekktar æxlunarstöðvar hvala og hafa hnúfubakar merktir hér við land og Noreg á síðustu árum sent vísindamönnum upplýsingar úr slíkum ferðum. aij@mbl.is