Góð hol fengust í Smugunni um helgina þar sem skip voru á makrílveiðum. Síðan hefur þó hægt á veiðunum eftir að makríllinn hefur í auknum mæli sótt í norska og færeyska lögsögu, að því er fram kemur í færslu á vef Síldarvinnslunnar. „Makríllinn, sem skipin eru að fá, er ágætt hráefni til vinnslu. Hann er ýmist heilfrystur, hausaður eða flakaður,“ segir í færslunni.

„Þetta er fínasti makríll, en hann er heldur smærri en verið hefur. Þarna er mest um að ræða 380-400 gramma fisk. Það var þokkalegt veiðiveður á miðunum en vissulega er dálítið leiðinlega langt að fara,“ er haft eftir Hjörvari Hjálmarssyni, skipstjóra á Berki.

Til hafnar með góðan afla

Íslensku skipin eru ekki mörg eftir í Smugunni enda héldu þau til hafnar með góðan afla. Þá er verið að landa 1.100 tonnum úr Bjarna Ólafssyni AK í Neskaupstað og er Börkur á leið þangað til löndunar með 1.660 tonn. Beitir NK yfirgaf Smuguna með 1.800 tonn til hafnar í Fuglafirði í Færeyjum og Margrét EA með 1.200 tonn til Kollafjarðar sem einnig er í Færeyjum.

„Við fiskuðum í þessari veiðiferð 2.130 tonn á 28 tímum. Það er býsna gott. Aflinn fékkst í fimm holum en við settum aflann úr fyrsta holinu um borð í Beiti,“ segir Hjörvar.

„Makríllinn á svæðinu, sem við vorum á, var að síga inn í norska og færeyska lögsögu en það var líka að fást ágætur afli nokkru norðar. Auðvitað vonast menn til að það gangi makríll inn í íslenska lögsögu en menn gefa sér ekki mikinn tíma til að leita á meðan hann gefur sig í Smugunni,“ útskýrir hann.

Smugan

• Hafsvæði í Barentshafi á milli efnahagslögsagna Noregs og Rússlands og fiskverndarsvæðisins við Svalbarða. 

Tengdar fréttir

Makrílveiðar

Útbreiðsla makríls í íslenskri landhelgi ein sú minnsta

• „Veiðiárangur er oft spurning um heppni“
• „Þetta gengur mjög rólega og lítið um makríl“
• Fyrsti makríllinn úr íslenskri lögsögu
• Tæplega fimm kíló af makríl fyrir eitt af þorski

» Fleiri tengdar fréttir

• Blogga um frétt