Margir í áhöfn togarans Gullvers, sem gerður er út frá Seyðisfirði, urðu áhyggjufullir eftir að stóra aurskriðan féll á byggðina í firðinum föstudaginn 18. desember.

Af þeim sökum fengu allir Seyðfirðingar í áhöfninni frí sem þess óskuðu.

Þetta kemur fram á vef Síldarvinnslunnar. Segir þar að skipið hafi verið kallað inn samdægurs og komið að landi aðfaranótt laugardagsins.

Í stað Seyðfirðinganna í áhöfninni komu Norðfirðingar og tók nánast örskotsstund að manna skipið, að því er segir á vef útgerðarinnar.

Hjálmar Ólafur Bjarnason. Ljósmynd/Síldarvinnslan

Skipstjóri í fyrsta sinn

Í skipstjórastólinn settist þá í fyrsta sinn Hjálmar Ólafur Bjarnason, en hann hefur verið stýrimaður á Gullveri frá árinu 2017.

Hjálmar Ólafur hóf sjómennsku á Barða NK einungis 16 ára að aldri árið 1999 og settist í Stýrimannaskólann árið 2010. Hann lauk síðan stýrimannaprófi árið 2014.

„Þetta bar brátt að en hamfarirnar á Seyðisfirði gerðu það að verkum að ég, Norðfirðingurinn, færi með skipið. Markmiðið með veiðiferðinni var að veiða karfa og okkur tókst með herkjum að ná þeim afla sem ætlast var til,“ er haft eftir Hjálmari á vef Síldarvinnslunnar.

Gekk stórslysalaust

„Veiðiferðin stóð einungis í um tvo sólarhringa og við reyndum fyrir okkur á hefðbundnum slóðum: Lónsdýpi, Hornafjarðardýpi og einnig úti á Þórsbanka.

Staðreyndin er sú að það voru ekki miklar væntingar um góðan afla. Auðvitað voru það tímamót að fara í sinn fyrsta túr sem skipstjóri og þetta gekk allt saman stórslysalaust.“

Tengdar fréttir

Aurskriður á Austurlandi

Gleymir seint deginum sem skriðurnar féllu

• Ógerlegt að verja atvinnuhúsnæði á Seyðisfirði
• Aflýsa óvissustigi
• Ekki merki um aukna skriðuhættu
• Gjörólík staða nú og fyrir tveimur árum

» Fleiri tengdar fréttir

• Blogga um frétt