Fínasta veiði á kolmunnamiðunum

Bjarni Ólafsson AK er nú á leið til Neskaupstaðar með fyrsta kolmunnafarminn eftir að veiðar hófust nýverið á gráa svæðinu suður af Færeyjum og er gert ráð fyrir að skipið verði komið til hafnar um klukkan ellefu í kvöld.

„Það er í reynd búin að vera fínasta veiði og skipin voru að hífa gott í morgun. Það mun hins vegar vera einhver kaldaskítur á miðunum núna,“ er haft eftir Runólfi Runólfssyni skipstjóra á vef Síldarvinnslunnar.

„Við erum með 1.700 tonn sem fengust í þremur holum. Í hvert sinn var dregið í 14-19 tíma. Það er býsna þröngt á miðunum þarna og veiðin fer fram á takmörkuðu svæði. Þarna er íslenski flotinn og færeysk skip og auk þess einir 20 Rússar,“ segir hann.

• Blogga um frétt