Ríkisstjórn Joes Bidens Bandaríkjaforseta tilkynnti í morgun að hún ætlar að dreifa um 400 milljónum hágæða gríma af gerðinni N95 ókeypis til Bandaríkjamanna. Tilgangurinn er að stemma stigu við útbreiðslu kórónuveirunnar.

Grímurnar verða fáanlegar í byrjun næstu viku á tugum þúsunda dreifingarstöðva víðs vegar um landið, aðallega í apótekum og á heilsugæslustofnunum.

„Þetta er mesta útbreiðsla á persónulegum varnarbúnaði í bandarískri sögu,“ sagði ónafngreindur embættismaður Hvíta hússins, í yfirlýsingu.

Hvíta húsið ætlar einnig að fjölga skimunum vegna kórónuveirunnar. Í gær var opnuð vefsíða þar sem fólk getur pantað ókeypis veirupróf sem hægt verður að taka heima við.  

Skimun á Flórída. AFP