Forseti Sýrlands, Bashar al-Assad, segir að þær milljónir sem hafa flúið Sýrland séu hryðjuverkamenn. Hann segir ekkert hæft í skýrslu Amnesty International um að allt að 13 þúsund manns hafi verið teknir af lífi í fangelsi fyrir utan Damaskus á fimm ára tímabili. Hann efast um heilindi samtakanna.
Assad er í viðtali við Yahoo News í dag og þar segir hann að þeir sem séu hryðjuverkamenn í Sýrlandi séu álitnir friðsamir flóttamenn í Evrópu og annars staðar á vesturlöndum.
Hann tekur undir með Donald Trump Bandaríkjaforseta um að öfgamenn séu meðal flóttamannanna. Þetta sé sama fólkið sem drepi almenna borgara í Sýrlandi með vélbyssum.
Assad segir ekki hversu margir þeirra 4,8 milljóna sem hafa flúið Sýrland séu hryðjuverkamann og segir að ekki þurfi að tilgreina fjöldann.
Spurður út í skýrslu Amnesty segir hann að skýrslur samtakanna séu alltaf hlutlægar og pólitískar. Skýrslan núna, sem fjallar um aftökur í Saydnaya fangelsinu, veki upp spurningar um áreiðanleika Amnesty International. Það sé til skammar fyrir slík samtök að birta slíka skýrslu án þess að leggja fram nokkur sönnunargögn.
„Við lifum á tímum lygafrétta,“ segir Assad. „Allir vita það,“ segir Assad og þvertekur fyrir það að stjórnvöld hafi fyrirskipað aftökur í fangelsinu. „Það er ekki rétt, svo sannarlega ekki rétt.“