Norður-Kórea skaut á loft langdrægu flugskeyti í morgun en aðgerðin misheppnaðist, að sögn suðurkóreska hersins. Stjórnvöld í Bandaríkjunum hafa hvatt þjóðir heims til að beita refsiaðgerðum í garð norðurkóreskra stjórnvalda.
Suður-Kórea og Bandaríkin hafa ákveðið að framlengja sameiginlegar heræfingar sínar sem snúa að loftvörnum, sem eru þær umfangsmestu til þessa. Ástæðuna fyrir því segja þau vera „ögranir” af hálfu Norður-Kóreu.
Fólk sem býr á ákveðnum svæðum í norðurhluta Japans var hvatt til að leita skjóls í loftvarnarbyrgjum vegna síðustu tilrauna Norður-Kóreumanna. Skutu þeir einnig á loft tveimur skammdrægum flugskeytum. Í gær skutu þeir yfir 20 flugskeytum á loft, þar á meðal einu sem lenti nálægt umráðasvæði Suður-Kóreu á hafi úti.
Þrátt fyrir að flugskeytatilraunin misheppnaðist í morgun hafa Bandaríkin fordæmt Norður-Kóreumenn.
„Þessi tilraun undirstrikar mikilvægi þess að allar þjóðir framfylgi að fullu samþykkt öryggisráðs Sameinuðu þjóðanna í tengslum við DPRK,” sagði Ned Price, talsmaður bandaríska utanríkisráðuneytisins, og átti þar við refsiaðgerðir í garð Norður-Kóreu.