Mikil sóun að rífa hús

Fimm hæða stórhýsi Iðnaðarbankans við Lækjargötu 12 var rifið fyrir fimm árum til að reisa mætti hótel á lóðinni.

Bankinn var síðan jarðsettur í Bolaöldum í hlíðum Vífilfells og víða í Reykjavík og Kópavogi. Steinsteypa og gler var grafið í Bolaöldu, steinsteypumulningur endurnýttur og jarðsettur í Reykjavík og Kópavogi, málmur sendur til meginlands Evrópu og endurunninn, timbur brennt á Grundartanga og málað timbur, einangrun og almennur úrgangur grafinn í Álfsnesi.

Arkitektinn Anna María Bogadóttir fylgdist með niðurrifinu, eins og hún rekur í bókinni Jarðsetning, og gerði einnig heimildarmynd um niðurrifið og innsetningar.

Erum steypuþjóð

„Mér finnst það náttúrlega rosalega mikil sóun að rífa hús og við erum komin á þann stað í samtímanum og við getum ekki leyft okkur að rífa hús. Framsæknasta svarið í arkitektúr í dag er að hætta að rífa. Þú getur komið með endalaust mikið af teikningum af nýjum húsum, en það framsæknasta og mikilvægasta er að hætta að rífa hús.“

Jarðsetning Iðnaðarbankans

• Blogga um frétt