Alexandra Jóhannsdóttir, landsliðskona í knattspyrnu, og liðsfélagar hennar í Fiorentina máttu sætta sig við svekkjandi tap fyrir Ítalíumeisturum Roma í vítaspyrnukeppni í ítölsku bikarúrslitunum í gærkvöldi.
Staðan var 3:3 eftir venjulegan leiktíma og framlengingu og vann Roma svo í vítaspyrnukeppni, 4:3. Rómverjar eru því tvöfaldir meistarar í ár.
Alexandra var í byrjunarliði Fiorentina og lagði upp þriðja mark liðsins þegar liðið komst í 3:1 á 72. mínútu. Roma minnkaði hins vegar muninn skömmu síðar og jafnaði metin á 90. mínútu.
Hún var tekin af velli á annarri mínútu uppbótartíma í framlengingunni og tók því ekki spyrnu í vítaspyrnukeppninni.