„Þessar tryggingar og ábyrgðir eru mjög mikilvægur hlekkur í keðju milliríkjaviðskipta, sérstaklega með vörur. [...] Ef sá markaður frýs þá hefur það keðjuverkandi áhrif. Búast mætti við að þeir sem hafa einhver tök á að bregðast við því myndu reyna að gera eitthvað til þess að liðka fyrir að þessar ábyrgðir séu veittar,“ útskýrir Gylfi.

Gylfi Magnússon. mbl.is/​Hari

„Ég á ekki von á því að þetta sé eitthvað að hrjá Íslendinga meira en aðra núna. Þetta er óþægilegt hvort sem menn eru að flytja út eða inn. En það er örugglega þannig að einhver fyrirtæki sem eru að kaupa íslenskar vörur, eins og fisk, standa kannski ekkert mjög vel,“ segir Gylfi. Þá hefur líklega lokun meðal annars veitingahúsa og mötuneyta erlendis haft neikvæð áhrif á innflytjendur íslenskra afurða sem gerir það erfiðara fyrir innflytjendurna að fá tryggingar þar sem þeirra lánstraust er talið lakara, sem um sinn truflar útflutninginn.

Spurður hvort það sé ástæða til þess að hafa sérstakar áhyggjur af þessari þróun svarar hann: „Þetta eru allavega ekki góðar fréttir. Auðvitað reikna menn með því að hlutirnir færist í eðlilegt horf þegar faraldurinn er að mestu genginn yfir, en það veit náttúrlega enginn tímasetninguna á því. Þetta verður áhyggjuefni næstu mánuði. Þetta er hluti af birtingarmynd og ástæða þess að milliríkjaviðskipti eru að dragast saman.“