Útflutningsverðmæti sjávarafurða í apríl á þessu ári var 15% hærra en í sama mánuði í fyrra og nam um 31 milljarði króna, samkvæmt bráðabirgðatölum Hagstofu Íslands. Á fyrstu fjóru mánuðum ársins er því útflutningsverðmæti sjávarafurða komið í 108 milljarða og hefur aldrei verið meiri á fyrsta ársþriðjungi.
„Þrátt fyrir þessa myndarlegu aukningu er vægi sjávarafurða í verðmæti vöruútflutnings á fyrstu 4 mánuðum ársins minna í ár en það hefur áður verið á þessari öld. Það nemur nú rúmlega 35% af verðmæti vöruútflutnings samanborið við rúmt 41% á sama tímabili í fyrra. Það skýrist augljóslega af því að verðmæti annars vöruútflutnings er að aukast umfram sjávarafurðir. Þá aukningu má í mun meira mæli rekja til verðhækkana fremur en magnaukningar,“ segir í greiningu Radarsins.
Flöskuhhálsar í flutningsleiðum
Talið er að stór loðnuvertíð í vetur hafi haft veruleg áhrif á aukningu útflutningsverðmæta þó svo að ekki sé hægt að sjá sundurliðun eftir tegundum í bráðabirgðatölunum. „Stærstan hluta af aukningunni má rekja til fiskimjöls. Útflutningsverðmæti þess nam um 6,2 milljörðum króna í apríl sem er um 660% aukning frá sama mánuði í fyrra á föstu gengi. Útflutningsverðmæti lýsis nam rúmlega 2,2 milljörðum króna sem er ríflega 280% aukning á milli ára.“
Samdráttur varð hins vegar í öðrum vöruflokkum. „Margir þættir geta skýrt samdrátt á milli ára. Flöskuhálsar hafa myndast í flutningum og staðan er almennt erfiðari eftir því sem fjarlægðin er meiri. Til að mynda hafa hertar sóttvarnaraðgerðir í Kína gert það að verkum að erfiðara gengur að koma afurðum á markað þar í landi. Svo ekki sé minnst á stríðið í Úkraínu en áhrifa þess gætir víða,“ segir í grieningunni.
Þá er vakin athygli á að 52% aukning hafi orðið í útflutningsverðmætum frystra flaka, en 10% samdráttur í ferskum afurðum og 39% samdráttur í rækju.